Jondal -Folgefonnlandsbyen
I Jondal er den korte avstanden frå fjord til fonn den raude tråden i naturopplevingane. Du byrjar dagen på breen og endar i kajakk eller ved bålet i fjøra om kvelden. Både Folgefonna Sommarskisenter og Folgefonni Breførarlag tilbyr aktivitetar på og kring breen. Nytt av året er Pilagutt som opnar nye moglegheiter i Hardanger, no er fjorden igjen blitt ferdselsveg og plass for store opplevingar. 25-27 juni 2010 er det Handverksmesse i Jondal, då er det yrande liv i bygda!

Nede ved fjorden kan du vandra kring i bygdene som er særprega av sveitsarstilhus med helletak og velstelte frukthagar bundne saman av smale grusgangar. I sentrum av sjølve Jondal finn ein blant anna turistinformasjonen, daglegvarebutikkar, flotte badestrender, utleige av syklar og kajakkar, GPS stiar, samt utleige av ulike båtar.

I Herand Landskapspark er det turstiar, klatrevegg, Hardanger kulturgalleri, helleristningar, båtbyggjarmuseum, oppgangssag og Meieriet pizzarestaurant. Både Jondal og Herand har trivlege gjestehamner med tilgang på drivstoff for båtfolket og eit variert overnattings tilbod, alt frå romantiske gardsstover til fjordnære rom.

Jondal turistinformasjon opna i nye lokale i 2009. Turistinformasjonen vert no å finne i "Juklafjord", som er sentralt plassert midt i Jondal sentrum. "Juklafjord" er eit sveitserstilbygg frå 1895 med mykje historie. Her har kunnskap blitt formidla i over hundreår. Folgefonni Breførarlag, Jondal reiselivslag og Folgefonnlandsbyprosjektet er ansvarlege for tilboda i turistinformasjonen i "Juklafjord".

Velkommen til Jondal

Nyttige telefonnummer i Jondal

Juklafjord er ope:

15.06-01.07: 09:30-16:00

01.07-15.08: 09:30 -18:00